బరువు తగ్గాలనుకునే వారు తరచూ గ్రీన్‌ టీ తాగడం వల్ల ఫలితం ఉంటుంది. గ్రీన్‌ టీ వల్ల జీర్ణక్రియ మెరుగవుతుంది. తద్వారా బరువు పెరగకుండా నియంత్రణలో ఉంటుంది.

గ్రీన్‌టీ యాంటీ ఆక్సిడెంట్లుగా పనిచేస్తుంది. దీంతో శరీరంలోని మలినాలను బయటకు పంపిస్తుంది. చర్మానికి తేమను అందిస్తూ మృదువుగా, యవ్వనంగా కనిపించేలా, ముడతలు పడకుండా చూస్తుంది.

గ్రీన్‌ టీలో ఉండే పాలీఫినాల్స్‌.. క్యాన్సర్‌ కణాలను చంపి, విస్తరించకుండా ఆపడంలో ప్రధానపాత్ర పోషిస్తాయని పలు పరిశోధనల్లో తేలింది.

ఇందులో ఉండే ఫ్లేవనాయిడ్లు, యాంటీ ఆక్సిడెంట్లు గుండె సంబంధిత వ్యాధుల్ని నిరోధించగలవు. చెడు కొవ్వు పెరగకుండా అడ్డుకోవడంతోపాటు రక్తనాళాల పనితీరును మెరుగుపరుస్తాయి.

గ్రీన్ టీలో ఎల్ థియానైన్ అనే ఎమైనో యాసిడ్ ఉంటుంది. ఇది మెదడు చురుకుగా పనిచేయడానికి దోహద పడుతుంది. అంతేకాదు, మెదడుకు సంబంధించిన అల్జిమర్స్‌, పార్కిన్సన్‌ తదితర వ్యాధులు రాకుండా ఉంటాయని పరిశోధనల్లో తేలింది.

గ్రీన్‌ టీ తాగితే ఆందోళన తగ్గిపోయి, ప్రశాంతత చేకూరుతుంది. ఇందులో ఉండే థియానైన్‌ మెదడులో అల్ఫా తరంగాల ఉత్పత్తిని ప్రేరేపించి ప్రశాంత స్థితి కలిగేలా చేస్తుంది. ధ్యానం మాదిరిగా మానసిక చురుకుదనాన్నీ కలిగిస్తుంది.

గ్రీన్‌టీలో ఉండే యాంటీ ఆక్సిడెంట్లు, ఇతర పోషకాల వల్ల రోగనిరోధక శక్తి పెరుగుతుంది.

శరీరంలో ఆర్థరైటిస్ నొప్పికి కారణమయ్యే కొన్ని అణువుల ఉత్పత్తిని గ్రీన్‌ టీ తగ్గిస్తుంది. ఎముకల ఆరోగ్యాన్ని మెరుగుపరచడంలో ప్రభావవంతంగా పనిచేస్తుంది.

గ్రీన్‌ టీ తాగడం వల్ల మనిషి జీవితకాలం కూడా పెరుగుతుందని జపాన్‌ శాస్త్రవేత్తలు నిర్వహించిన పరిశోధనలో తేలింది.