టాలీవుడ్‌లో తెలుగు అమ్మాయిలు హీరోయిన్‌గా కనిపించడం చాలా అరుదు. అలాంటి అరుదైన అమ్మాయే చాందినీ చౌదరి.

తాజాగా కిరణ్‌ అబ్బవరం హీరోగా వస్తోన్న ‘సమ్మతమే’ చిత్రంలో కథానాయికగా నటించిందామె.

చాందినీ.. ఏపీలోని విశాఖపట్నంలో 1993 అక్టోబర్‌ 23న జన్మించింది. బెంగళూరులో మెకానికల్‌ ఇంజినీరింగ్‌ పూర్తి చేసింది.

ఇంజినీరింగ్‌ చదువుకునే రోజుల్లోనే ప్రేమ.. ప్రేమ, ట్రూ లవ్‌, సాంబార్‌ ఇడ్లీ, రోమియో, అప్రోచ్‌ తదితర షార్ట్‌ ఫిల్మ్స్‌లో నటించింది.

రాజ్‌ తరుణ్‌తో కలిసి నటించిన ‘ది బ్లైండ్‌ డేట్‌’ షార్ట్‌ ఫిల్మ్‌ చాందినీకి మంచి గుర్తింపు తెచ్చిపెట్టింది.

ఆ తర్వాత ‘లైఫ్‌ ఈజ్‌ బ్యూటీఫుల్‌’, ‘ప్రేమ ఇష్క్‌ కాదల్‌’ చిత్రాల్లో చిన్న పాత్రల్లో కనిపించింది.

2015లో ‘కేటుగాడు’ చిత్రంతో హీరోయిన్‌గా మారింది చాందినీ. కుందనపు బొమ్మ, శమంతకమణి, హౌరా బ్రిడ్జ్‌, బొంబాట్‌ వంటి పలు చిత్రాల్లో నటించినా పెద్దగా గుర్తింపు దక్కలేదు.

‘మను’ చిత్రంలో ఆమె నటనకు విమర్శకుల ప్రశంసలు లభించాయి. ‘కలర్‌ ఫొటో’ చిత్రంతో ఆమెకు యూత్‌లో క్రేజ్‌ పెరిగింది.

సినిమాలే కాదు.. వెబ్‌సీరిస్‌ల్లోనూ నటిస్తోంది చాందినీ. ఇప్పటి వరకు గాడ్స్‌ ఆఫ్‌ ధర్మపురి, మస్తీస్‌, అన్‌హియర్డ్‌, గాలివాన తదితర సీరిస్‌ల్లో నటించి మెప్పించింది.

చాందినీ చిన్నప్పుడు త్రో బాల్‌ ఛాంపియన్‌. కథలు కూడా రాసేదట. దీంతో పెద్దాయక రైటర్‌ అవ్వాలనుకుంది. ఇప్పుడు నటిగా స్థిరపడి ఆ తర్వాత దర్శకత్వం చేయాలని ఫిక్సయిందట.

చాందినీ అభిమాన దర్శకుడు.. మణిరత్నం. ఆయన సినిమాలో నటించాలని ఉందని ఓ ఇంటర్వ్యూలో వెల్లడించింది.

ఓ నిర్మాత వల్ల రెండేళ్ల విలువైన సమయం వృథా అయిందట. లేకపోతే ఈపాటికి నటిగా మంచి స్థాయిలో ఉండేదానన్ని చెప్పుకొచ్చింది.

ఊహలు గుసగుసలాడే, కుమారి 21ఎఫ్‌, పటాస్‌, దృశ్యం చిత్రాల్లో చాందినీనే నటించాల్సింది.. కానీ, పలు కారణాల వల్ల చేయలేకపోయిందట.