‘అందాల రాక్షసి’తో టాలీవుడ్‌కి పరిచయమైన లావణ్య త్రిపాఠి.. ఇప్పుడు సరికొత్త కథతో ప్రేక్షకుల ముందుకొస్తోంది.

తాజాగా ఆమె ప్రధాన పాత్రలో నటించిన ‘హ్యాపీ బర్త్‌డే’ జులై 8న విడుదల కానుంది. ఇందులో తన కామెడీ రోల్‌ను ఎంజాయ్‌ చేస్తూ చేశానని చెప్పింది.

లావణ్య త్రిపాఠి 1990 డిసెంబరు 15న ఉత్తర్‌ప్రదేశ్‌లోని అయోధ్యలో జన్మించింది. పెరిగింది మాత్రం ఉత్తరాఖండ్‌లో.

ఉన్నత చదువుల నిమిత్తం ముంబయి వెళ్లిన లావణ్య.. రిషి దయారామ్‌ నేషనల్‌ కాలేజ్‌లో ఎకనామిక్స్‌లో గ్రాడ్యుయేషన్‌ పూర్తి చేసింది.

మోడలింగ్‌పై ఆసక్తి ఏర్పడటంతో అటువైపుగా అడుగులు వేసింది. పలు వాణిజ్య ప్రకటనలు, టెలివిజన్‌ షోలలో నటించింది. 2006లో మిస్‌ ఉత్తరాఖండ్‌గా ఎంపికైంది.

2012లో వచ్చిన ‘అందాల రాక్షసి’లో మిథునగా అమాయకపు అమ్మాయిగా తన నటనతో అలరించింది. తొలి చిత్రంతోనే యువతలో క్రేజ్‌ సంపాదించింది.

ఆ తర్వాత ‘దూసుకెళ్తా’, ‘భలే భలే మగాడివోయ్‌’, ‘సోగ్గాడే చిన్నినాయనా’, ‘శ్రీరస్తు శుభమస్తు’, ‘అర్జున్‌ సురవరం’ తదితర చిత్రాల్లో నటించి ఆకట్టుకుంది.

‘గీత గోవిందం’లో కథానాయికగా చేసే అవకాశం ముందుగా లావణ్య త్రిపాఠినే వరించిందట. కొన్ని కారణాల వల్ల ఆ సినిమా చేయలేకపోయానని, అందుకు ఇప్పటికీ బాధపడుతుంటానని లావణ్య ఓ సందర్భంలో తెలిపింది.

లావణ్యకి కోపం ఎక్కువట. ఈ ఒక్కటీ మినహా తనలో మార్చుకునే అంశం మరేదీ లేదని చెప్పుకొచ్చింది.

తాను నటిని కావడానికి అలనాటి తారలు శ్రీదేవి, మాధురీ దీక్షిత్‌లే స్ఫూర్తి అని పలు సందర్భాల్లో వెల్లడించింది లావణ్య.