తాప్సీ పన్ను.. దక్షిణాదిన తెరంగేట్రం చేసి.. బాలీవుడ్‌లో సత్తా చాటుతున్న బ్యూటిఫుల్‌ అండ్‌ టాలెంటెడ్‌ హీరోయిన్‌.

భారత మహిళా క్రికెటర్‌ మిథాలీ రాజ్‌ బయోపిక్‌ ‘శభాష్‌ మిథూ’లో ప్రధాన పాత్ర పోషిస్తున్న ఈ అమ్మడు.. తాజాగా మరో బంఫర్‌ ఆఫర్‌ కొట్టేసింది.

షారుక్‌ ఖాన్‌ - రాజ్‌కుమార్‌ హిరాణీ కాంబినేషన్‌లో రాబోతున్న ‘డంకి’లో హీరోయిన్‌గా అవకాశం దక్కించుకుంది.

ఈ అవకాశం తనకు సిఫార్సులతో రాలేదని, తన ప్రతిభను చూసే వచ్చిందని చెబుతోంది. షారుఖ్‌తో నటించే అవకాశం రావడాన్ని వరంగా భావిస్తోంది.

1987 ఆగస్టు 1న దిల్లీలో పంజాబీ కుటుంబంలో జన్మించిన తాప్సీ.. అక్కడే కంప్యూటర్‌ సైన్స్‌లో ఇంజినీరింగ్‌ చదివింది.

సాఫ్ట్‌వేర్‌ ఇంజినీర్‌గా కొంతకాలం ఉద్యోగం కూడా చేసింది. 2008లో ‘గెట్‌ గార్జియస్‌’ అనే టాలెంట్‌ షోలో తాప్సీ ఎంపికైంది. దీంతో మోడలింగ్‌ వైపు వెళ్లింది.

2008లో పాంటలూన్‌ ఫెమినా మిస్‌ ఫ్రెష్‌ ఫేస్‌, సఫీ ఫెమినా మిస్‌ బ్యూటిఫుల్‌ స్కిన్‌ టైటిల్స్‌ గెలుచుకుంది. పలు బ్రాండ్స్‌ కోసం టీవీ యాడ్స్‌లో నటించింది.

2010లో రాఘవేంద్రరావు దర్శకత్వం వహించిన ‘ఝుమ్మంది నాదం’ తో చిత్రసీమలో అడుగుపెట్టింది. ఆ తర్వాత సినీ అవకాశాలు క్యూ కట్టాయి.

2011లో ప్రభాస్‌ ‘మిస్టర్‌ పర్‌ఫెక్ట్‌’లో హీరోయిన్‌గా నటించింది. ఇందులో తాప్సీ పాత్రకి మంచి మార్కులే పడ్డాయి.

తెలుగుతోపాటు తమిళ చిత్రాల్లోనూ నటించిన తాప్సీ.. 2013లో ‘చష్మే బద్దూర్‌’తో బాలీవుడ్‌ ఎంట్రీ ఇచ్చింది.

‘పింక్‌’ చిత్రంతో ఆమెకు బీటౌన్‌లో పాపులారిటీ పెరిగింది. ఓ వైపు గ్లామర్‌ పాత్రల్లో నటిస్తూనే మరోవైపు మహిళా ప్రాధాన్యమున్న చిత్రాలు చేస్తూ లేడీ సూపర్‌స్టార్‌గా ఎదుగుతోంది.

‘శాండ్‌ కి ఆంఖ్‌’లో ఉత్తమ నటి (క్రిటిక్స్‌), ‘థప్పడ్‌’లో ఉత్తమ నటిగా ఫిల్మ్‌ఫేర్‌ అవార్డులు అందుకుంది తాప్సీ. ఇవే కాకుండా తన నటనకు ఎన్నో అవార్డులు దక్కాయి.

మొదట్లో తను మరింత అందంగా కనిపించడానికి ఎన్నో ప్రయత్నాలు చేసిందట. కానీ, మనల్ని మనం ఇష్టపడితే తప్పకుండా బాహ్యప్రపంచానికి ఎంతో అందంగా కనిపిస్తామని అర్థం చేసుకొని ఆ ప్రయత్నాలు విరమించిందట.

ఈ ముద్దుగుమ్మ నటిగానే కాదు.. నిర్మాతగానూ మారింది. స్నేహితులతో కలిసి ‘ఔట్‌సైడర్‌ ఫిల్మ్‌’ అనే నిర్మాణ సంస్థను ఏర్పాటు చేసింది. అలాగే, తన సోదరితో కలిసి ‘ది వెడ్డింగ్‌ ఫ్యాక్టరీ’అనే ఈవెంట్‌ మేనెజ్‌మెంట్‌ కంపెనీని నడిపిస్తోంది.

తాప్సీ చేతిలో ప్రస్తుతం అరడజనుకుపైగా ప్రాజెక్టులున్నాయి. ఏదైనా ముక్కుసూటిగా మాట్లాడే తాప్సీ.. తన పంథాలోనే ముందుకు సాగుతోంది.