పూరీ జగన్నాథ్‌, విజయ్‌ దేవరకొండ కాంబినేషన్‌లో ‘లైగర్‌’ సినిమా రాబోతున్న విషయం తెలిసిందే. ఈ చిత్రం విడుదలకు ముందే వీరిద్దరూ కలిసి ‘జనగణమన’ పేరుతో మరో చిత్రాన్ని పట్టాలెక్కిస్తున్నారు. పూరీ దర్శకత్వంలో విజయ్‌ ఒక్కడే కాదు.. టాలీవుడ్‌లో చాలా మంది హీరోలు పూరీతో రెండేసి సినిమాలు చేసిన వారే. వారెవరంటే...

మాస్ మహారాజ్‌ రవితేజ మాత్రం పూరీ జగన్నాథ్ దర్శకత్వంలో ఇప్పటి వరకు ఐదు సినిమాలు చేశారు. ఇట్లు శ్రావణి సుబ్రమణ్యం, ఇడియట్‌, అమ్మనాన్న ఓ తమిళ అమ్మాయి చిత్రాలు హిట్ కాగా.. నేనింతే, దేవుడు చేసిన మనుషులు చిత్రాలు ఫర్వాలేదనిపించాయి.

పూరీ జగన్నాథ్ డైరెక్షన్‌లో ‘కింగ్‌’ నాగార్జున ఇప్పటివరకు రెండు సినిమాల్లో నటించారు. 2003లో వచ్చిన ‘శివమణి’ సినిమా మంచి విజయాన్ని సొంతం చేసుకుంది. వీరిద్దరి కాంబినేషన్‌లో వచ్చిన మరో చిత్రం ‘సూపర్‌’.

పవర్‌స్టార్‌ పవన్‌ కల్యాణ్, పూరీ జగన్నాథ్ కాంబినేషన్‌లో రెండు సినిమాలు వచ్చాయి. 2000లో విడుదలైన బద్రి, 2012లో వచ్చిన కెమెరామెన్‌ గంగతో రాంబాబు చిత్రాలు మంచి విజయాలను అందుకున్నాయి.

టాలీవుడ్ అగ్రహీరోల్లో ఒకరైన ఎన్టీఆర్‌, పూరీ కాంబినేషన్‌లో రెండు సినిమాలు తెరకెక్కాయి. 2004లో విడుదలైన ‘ఆంధ్రావాలా’ నిరాశపర్చగా.. 2015లో వచ్చిన‘టెంపర్‌’ సూపర్‌ హిట్‌ అయింది.

ఐకాన్‌ స్టార్ అల్లు అర్జున్‌.. పూరీ జగన్నాథ్‌ కాంబినేషన్‌లో వచ్చిన రెండు చిత్రాలు ‘దేశముదురు’, ‘ఇద్దరమ్మాయిలతో’ మంచి విజయాలను అందుకున్నాయి.

టాలీవుడ్‌ అగ్ర కథానాయకుడు మహేశ్‌బాబు, దర్శకుడు పూరీ జగన్నాథ్ కాంబినేషన్‌లో ఇప్పటివరకు రెండు సినిమాలు వచ్చాయి. 2006లో విడుదలైన ‘పోకిరి’ ఇండస్ట్రీ హిట్‌ కొట్టగా.. 2012లో వచ్చిన ‘బిజినెస్‌మేన్‌’ సూపర్‌హిట్‌గా నిలిచింది.

బహుబలి సినిమాతో పాన్‌ ఇండియాస్టార్‌గా మారిపోయాడు ప్రభాస్‌. పూరీ జగన్నాథ్‌, ప్రభాస్ కాంబినేషన్‌లో రెండు సినిమాలు వచ్చాయి. 2008లో ‘బుజ్జిగాడు’ చిత్రం విడుదల కాగా.. 2009లో ‘ఏక్‌నిరంజన్‌’ ప్రేక్షకుల ముందుకు వచ్చింది.