టీమ్‌ఇండియా మాజీ కెప్టెన్‌ ఎం.ఎస్‌.ధోనీ నేటితో 40 ఏళ్లు పూర్తిచేసుకుని 41వ ఏటలోకి అడుగుపెడుతున్నాడు. ఈ సందర్భంగా అతడు నెలకొల్పిన పలు రికార్డులపై ఓ లుక్కేద్దాం.

మైదానంలో ఒత్తిడికి లోనవకుండా ప్రశాంతంగా ఉండే ధోనీని ముద్దుగా ‘మిస్టర్‌ కూల్‌’ అని పిలుస్తుంటారు.

ధోనీ సారథ్యంలో టీమ్‌ఇండియా 3 ఐసీసీ ట్రోఫీలు (ఐసీసీ టీ20 ప్రపంచకప్‌ 2007, ఐసీసీ వన్డే ప్రపంచకప్‌ 2011, ఐసీసీ ఛాంపియన్స్‌ ట్రోఫీ 2013) సాధించింది. భారత కెప్టెన్లలో ధోనీకే ఈ ఘనత దక్కింది.

అంతర్జాతీయ క్రికెట్‌లో ఎక్కువ (332 మ్యాచ్‌లు.. 200 వన్డేలు, 60 టెస్టులు, 72 టీ20లు)కు సారథ్యం వహించిన ఏకైక ఆటగాడు ధోనీనే.

వన్డేల్లో అత్యధిక స్టంపింగ్స్‌ (123) చేసిన రికార్డు ఈ ఝార్ఖండ్‌ డైనమైట్ పేరిటే ఉంది.

టెస్టుల్లో అత్యధిక (60) మ్యాచ్‌లకు సారథ్యం వహించిన ఏకైక కెప్టెన్‌ కమ్‌ వికెట్ కీపర్.

వన్డేల్లో వికెట్‌కీపర్‌ కమ్ బ్యాటర్‌గా అత్యధిక స్కోరు 183 నాటౌట్‌. (2005లో శ్రీలంకపై)

అంతర్జాతీయ టీ20ల్లో ఒకే ఇన్నింగ్స్‌లో అత్యధిక క్యాచ్‌లు (5) అందుకుంది ధోనీయే.

అంతర్జాతీయ క్రికెట్‌లో అన్ని ఫార్మాట్లలో మిస్టర్‌ కూల్‌ 195 స్టంపింగ్‌లు చేసి తొలి స్థానంలో ఉన్నాడు.

దూకుడైన ఆటతీరుకు మారుపేరైన ధోనీ వన్డే ఛేదనల్లో 9 సార్లు సిక్స్‌తో మ్యాచ్‌ని ముగించాడు. 2011 ప్రపంచకప్‌లో సిక్సర్ బాది భారత్‌ని విశ్వవిజేతగా నిలిపిన సంగతి తెలిసిందే.

వన్డే ఛేదనల్లో 47 సార్లు నాటౌట్‌గా నిలిచి జట్టును విజయతీరాలకు చేర్చాడు. ఈ రికార్డుకు దరిదాపుల్లో ఏ ఆటగాడు కూడా లేడు. ధోనీ నాటౌట్‌గా ఉండి టీమ్‌ఇండియా ఓడిపోయింది రెండుసార్లే.

వన్డేల్లో కెప్టెన్‌ కమ్‌ వికెట్‌ కీపర్‌గా 6641 పరుగులు చేసిన ఏకైక ఆటగాడు ధోనీయే. మొత్తం 350 మ్యాచ్‌లు ఆడి 200 మ్యాచ్‌ల్లో టీమ్‌ఇండియాకు సారథ్యం వహించాడు.