నటి నయనతార.. డైరెక్టర్‌ విఘ్నేశ్‌ శివన్‌ వివాహబంధంతో ఒక్కటయ్యారు.

గురువారం మహాబలిపురంలో ఏర్పాటు చేసిన వివాహ వేదికలో నయన్‌ మెడలో విఘ్నేశ్‌ మూడు ముళ్లు వేశారు.

దంపతులుగా మారిన తర్వాతి రోజే ఈ జంట తిరుమల శ్రీవారిని దర్శించుకుంది.

2015లో విఘ్నేశ్‌ తెరకెక్కించిన ‘నేనూ రౌడీనే’ చిత్రంలో నటించింది నయన్‌. అదే సమయంలో ఇరువురు ప్రేమలో పడ్డారని టాక్‌ వచ్చింది.

అది నిజమే అయినా.. చాలా కాలం పాటు వారి ప్రేమ విషయాన్ని గోప్యంగా ఉంచారు.

2017 నుంచి తరచూ వీరిద్దరూ కలిసి విహారయాత్రలు చేస్తుండటంతో వీరి ప్రేమాయణం గురించి అందరికీ తెలిసింది.

నయన్‌లో ఉన్న ఆత్మవిశ్వాసమే తనని కట్టిపడేసిందని విఘ్నేశ్‌ ఓ సందర్భంలో చెప్పారు.

విఘ్నేశ్‌ మంచి మనసు, సపోర్టింగ్‌ నేచర్‌ నా మనసును తనకు అంకితం చేసేలా చేసిందని అంటోంది.. నయనతార.

ఇద్దరి పుట్టిన రోజులు, న్యూ ఇయర్‌, వాలంటైన్స్‌ డే ఇలా ప్రతి సందర్భాన్ని నయన్‌-విఘ్నేశ్‌ విదేశాల్లో వేడుకగా జరుపుకున్నారు.

2018లో ఈ జంట.. అమృత్‌సర్‌లోని స్వర్ణ దేవాలయాన్ని సందర్శించింది. ఈ విషయాన్ని తెలియజేస్తూ విఘ్నేశ్‌ ఇన్‌స్టాలో పోస్టు చేశారు.

నయన్‌పై ఉన్న ప్రేమను విఘ్నేశ్‌ తరచూ సోషల్‌మీడియా వేదికగా వ్యక్తపరుస్తూ ఉంటారు. ఇద్దరూ కలిసి దిగిన ఫొటోలను షేర్‌ చేస్తుంటారు.

వివాహం తర్వాత కూడా.. నయన్‌ తన జీవితంలోకి మేడమ్‌గా వచ్చి.. తనే జీవితంగా.. ఇప్పుడు భార్యగా మారిందని చెబుతూ పోస్టు పెట్టారు. దేవుడికి కృతజ్ఞతలు తెలిపారు.

ఇటీవల విఘ్నేశ్‌ శివన్‌ దర్శకత్వంలో మరోసారి ‘కాతువకుల రెండు కాదల్‌’ అనే చిత్రంలో నటించింది నయన్‌. వీరిద్దరూ కలిసి ‘రౌడీ పిక్చర్స్‌’ పేరుతో సినిమాలు నిర్మిస్తున్నారు.