ప్రముఖ, నమ్మదగిన వెబ్‌సైట్లలో మాత్రమే షాపింగ్‌ చేయండి.

ఆఫర్స్‌ ఉన్నాయంటూ కనిపించే నకిలీ వెబ్‌సైట్ల జోలికి వెళ్లొద్దు.

ఈ-కామర్స్‌ వెబ్‌సైట్‌కు సంబంధించిన లాగిన్‌ వివరాలు ఎవరితోనూ పంచుకోవద్దు.

మీ వ్యక్తిగత వివరాల్లో వెబ్‌సైట్‌కు అవసరమైనవే(పేరు, చిరునామా, మొబైల్‌ నంబర్‌) తప్ప మరే వివరాలు నమోదు చేయొద్దు.

ఒక వెబ్‌సైట్‌లో వస్తువును కొనుగోలు చేసే ముందు.. ఇతర వెబ్‌సైట్లలో.. అలాగే, బయట దుకాణాల్లో వాటి ధర ఎంత ఉందో తెలుసుకోవడం మంచిది. బయట తక్కువుంటే అక్కడే కొనుగోలు చేయొచ్చు.

ఆన్‌లైన్‌లో కొన్ని వస్తువులకు లేదా నిర్దేశించిన మొత్తం బిల్లుకు మాత్రమే ఉచిత డెలివరీ సదుపాయం ఉంటుంది. లేదంటే డెలివరీ ఛార్జీలు ఉంటాయి. వాటిని పరిశీలించాలి.

ఆఫర్ల విషయంలో అవగాహన ఉండాలి. కొన్ని సార్లు ఉన్న ధరను పెంచి.. తగ్గించినట్లు చూపిస్తారు. కాబట్టి, ఆఫర్ కింద వాస్తవ ధరను తగ్గిస్తేనే కొనుగోలు చేయాలి.

కొన్ని వస్తువులకు మాత్రమే రిటర్న్‌ పాలసీ ఉంటుంది. మీరు కొనే వస్తువుకు అది ఉందో లేదో చెక్‌ చేయాలి. లేదంటే కొన్న వస్తువు నచ్చకపోతే నష్టపోవాల్సి వస్తుంది.

డెబిట్‌, క్రెడిట్‌ కార్డుల ద్వారా బిల్లు చెల్లింపులు జరిపితే వాటికి సంబంధించిన లావాదేవీలను వెంటనే సరిచూసుకోవాలి.