కొన్నిసార్లు ఎంత కష్టపడి పనిచేద్దామన్నా ఏకాగ్రత కుదరకపోవచ్చు. మనసు, ఆలోచనలు ఎటువైపో.. వెళ్తుంటాయి. అలా జరగకుండా.. పనిపైనే ఏకాగ్రత కలగాలంటే కొన్ని చిట్కాలున్నాయి. వాటిని పాటించి చూడండి..

పని గంటలను 25 నిమిషాల చొప్పున భాగాలుగా విభజించుకోవాలి. ఈ ఒక్క సెషన్‌ని పోమోడోరోగా పిలుస్తారు. ఒక పోమోడోరో ముగిసిన వెంటనే 5 నిమిషాలు విశ్రాంతి తీసుకోవాలి. ఇలా చేస్తే మెదడు చురుగ్గా తయారవుతుంది. ఏకాగ్రత పెరుగుతుంది.

వ్యాయామంతో రోజును ప్రారంభిస్తే మెదడులోని నరాలు, కార్టిసాల్‌ హార్మోన్లు చురుగ్గా తయారవుతాయట. కనీసం 20 నిమిషాలైనా నడక, యోగా, ప్రాణాయామం చేస్తే.. ఏకాగ్రత కుదురుతుంది.

రోజుకి పది నిమిషాల చొప్పున కనీసం ఎనిమిది వారాలపాటు ధ్యానం చేస్తే ఒత్తిడి తగ్గి ఏకాగ్రత, జ్ఞాపకశక్తి పెరుగుతాయి. ఒకే పనిని పదే పదే చేస్తుంటే మెదడులో అంతర్లీనంగా అది రికార్డు అవుతుంది.

ఒకే సమయంలో నాలుగైదు రకాల పనులు చేస్తే ఉత్పాదకత పెరుగుతుందని భావిస్తుంటారు చాలామంది. కానీ మన మెదడు ఈ మల్టీ టాస్కింగ్‌కి అనుగుణంగా తయారు కాలేదు. ఇలా చేస్తే దేని మీద కూడా పూర్తి ఏకాగ్రత పెట్టలేం. అందుకే ఒకే సమయంలో ఒకే టాస్క్‌ పెట్టుకోవాలి.

మెదడుకి ఎక్కువ ఆక్సిజన్‌ అందించడం ద్వారా మెదడులోని సెరిబ్రల్‌ కార్టెక్స్‌, హిప్పోక్యాంపస్‌ ఉత్తేజితమై చురుగ్గా పని చేస్తుందట. పజిల్స్‌ పూర్తి చేయటం, చెస్‌ ఆడటం, సృజనాత్మకంగా ఆలోచించడం.. ఇవన్నీ మెదడుకి ఆక్సిజన్‌ ఇచ్చే వ్యాయామాలు.

మన చుట్టూ ఉన్న వాతావరణం సైతం పనిలో ఏకాగ్రత కుదరడానికి కారణమవుతుంది. గదిలో మంచి వెలుతురు వచ్చేలా, సౌకర్యవంతంగా కూర్చునేలా, సరైన ఉష్ణోగ్రత ఉండేలా చూసుకోవాలి. చుట్టుపక్కల చిరాకు పెట్టించే, అదేపనిగా కబుర్లు చెప్పే వ్యక్తులు లేకుండా చూసుకోవాలి.