మన దేశం పేరును ఇండియాకి బదులు భారత్‌గా మార్చేందుకు కేంద్ర ప్రభుత్వం సిద్ధమవుతున్నట్టు వార్తలు వస్తున్నాయి. ఇప్పటికే పలు చోట్ల ఇండియా స్థానంలో భారత్‌ అని పేర్కొంటోంది. గతంలో కొన్ని దేశాలు కూడా పేరు మార్చుకున్నాయ్‌. వాటిలో ముఖ్యమైన వాటి వివరాలివి!

బర్మా-మయన్మార్‌

భారత్‌ పొరుగు దేశం. 1989లో అధికారంలో ఉన్న సైన్యం.. దేశం పేరును బర్మా నుంచి మయన్మార్‌గా మార్చింది. ఐక్యరాజ్య సమితి కూడా ఈ పేరును ఆమోదించింది.

టర్కీ - తుర్కియే

గతేడాదిలో టర్కీ ప్రభుత్వం తమ దేశం పేరును తుర్కియేగా మార్చుకుంది. అక్కడి వారి సంస్కృతి, సంప్రదాయాలు, నాగరికత, విలువలకు ‘తుర్కియే’ పేరు అద్దం పడుతుందని పేర్కొంది. 

పర్షియా - ఇరాన్‌

భారత్‌ చరిత్రలోనూ పర్షియా పేరు వినిపిస్తుంటుంది. 1935లో ఈ దేశం పేరును ఇరాన్‌గా మార్చారు.

సియామ్‌ - థాయ్‌లాండ్‌

దేశం పేరును 1939లో సియామ్‌ నుంచి థాయ్‌లాండ్‌గా మార్చారు. థాయ్‌ అంటే స్వతంత్ర మనిషి అని అర్థం. స్వతంత్ర మనుషులు ఉండేచోటు కాబట్టి దీన్ని ‘థాయ్‌లాండ్‌’ అని మార్చినట్లు చెబుతుంటారు.

హాలెండ్‌ - నెదర్లాండ్స్‌

రెండు పెద్ద రాష్ట్రాలు హాలెండ్‌ పేరుతో ఉండేవి. దేశం పేరు ఈ ప్రాంతాలను మాత్రమే సూచిస్తుండటంతో పేరు మార్చాలని ప్రభుత్వం భావించింది. అలా 2020లో కింగ్‌డమ్‌ ఆఫ్‌ ‘నెదర్లాండ్స్‌’గా మార్చారు.

సిలోన్‌ - శ్రీలంక

సిలోన్‌కు స్వాతంత్ర్య వచ్చిన తర్వాత నేతలు దేశం పేరు మార్చాలని భావించారు. ఈ క్రమంలోనే శ్రీలంకగా మార్చారు. 

చెక్‌ రిపబ్లిక్‌ - చెకియా

చెక్‌ రిపబ్లిక్‌ దేశం 2016లో చెకియాగా మారింది. వ్యాపారులకు, క్రీడల్లో జట్లకు దేశం పేరును ఉపయోగించటం సులభతరం చేసేందుకు అక్కడి ప్రభుత్వం పేరులో మార్పు చేసింది.

రోడేసియా - జింబాబ్వే

బ్రిటీష్‌ పాలన నుంచి 1980లో రొడేసియాకు స్వాతంత్ర్యం వచ్చింది. దీంతో బ్రిటీష్‌ పాలనను మర్చిపోయి సార్వభౌమాధికార దేశంగా మారిన నేపథ్యంలో దేశం పేరును జింబాబ్వేగా మార్చారు.