దేశంలోనే అతి పెద్ద ఐపీఓకు హ్యుందాయ్‌ మోటార్‌ ఇండియా సిద్ధమైంది. ఈ ఐపీఓపై మదుపర్లలో ఆసక్తి నెలకొంది.

హ్యుందాయ్‌ అనుబంధ హ్యుందాయ్‌ మోటార్‌ ఇండియా లిమిటెడ్‌ ఐపీఓ ద్వారా రూ.27,870 కోట్లు సమీకరించనుంది.

ఈ పబ్లిక్‌ ఇష్యూ అక్టోబర్ 15- 17 మధ్య తేదీల్లో జరగనుంది. ధరల శ్రేణి రూ.1,865-1,960గా కంపెనీ నిర్ణయించింది. యాంకర్‌ మదుపర్లు 14న బిడ్లు దాఖలు చేసుకోవచ్చు.

రూ.1.6 లక్షల కోట్ల మార్కెట్‌ విలువతో ఐపీఓకు వస్తోంది. తాజా షేర్లను జారీ చేయడం లేదు.

రిటైల్‌ ఇన్వెస్టర్లు కనీసం 7 షేర్లు (ఒక లాట్‌) కొనుగోలు చేయాల్సి ఉంటుంది. అంటే ఒక్కో లాట్‌ కొనుగోలుకు రూ.13,720 వెచ్చించాలి. గరిష్ఠంగా 14 లాట్లు కొనుగోలు చేయొచ్చు.

ఐపీఓలో భాగంగా 14,21,94,700 ఈక్విటీ షేర్లను కంపెనీ ఈ ఇష్యూలో విక్రయించనుంది.

అర్హత కలిగిన ఉద్యోగుల కోసం 7,78,400 షేర్లను రిజర్వ్‌ చేసింది. ఒక్కో షేరును రూ.186 రాయితీపై వీరికి కేటాయిస్తారు.

విక్రయానికి ఉంచిన మొత్తం షేర్లలో 50% అర్హత కలిగిన సంస్థాగత మదుపర్లకు, 15% సంస్థాగతేతర మదుపర్లకు, 35% రిటైలర్లకు కేటాయిస్తారు.

భారత్‌లో 1996 నుంచి కార్యకలాపాలు నిర్వహిస్తున్న హ్యుందాయ్‌ మోటార్‌.. మారుతీ సుజుకీ తర్వాత రెండో అతిపెద్ద కార్ల తయారీ కంపెనీగా ఉంది.