ద్వాదశ జ్యోతిర్లింగాలన్నీ ఒకే చోట కనిపిస్తే... పూరీ జగన్నాథుడితోపాటూ బద్రీనాథుడినీ ఒకేసారి దర్శించుకోగలిగితే... అంతకన్నా భాగ్యం ఏముంటుంది? 

ద్వారకాధీశుడితోపాటూ ఆకాశాన్నంటుతున్నట్లుగా కనిపించే పరమేశ్వరుడి విగ్రహాన్ని కూడా చూడాలంటే చార్‌ధామ్‌గా పిలిచే సిద్ధేశ్వర్‌ ధామ్‌కు వెళ్లాల్సిందే.

సిక్కింలోని నామ్‌చీలో సోలోపోక్‌ కొండపైన కనిపించే ఈ ఆధ్యాత్మిక ధామాన్ని అక్కడి ప్రభుత్వం సుమారు పన్నెండు సంవత్సరాల క్రితం నిర్మించింది. 

విశాలమైన ప్రాంగణంలో అడుగడుగునా ఆధ్యాత్మికత ఉట్టిపడే ఈ సన్నిధానంలో 108 అడుగుల ఎత్తులో కనిపించే పరమశివుడి విగ్రహం ఇక్కడి ప్రత్యేకత

పరమేశ్వరుడికి ఎదురుగా నంది కొలువుదీరి ఉంటుంది.

స్వామి చుట్టూ ద్వాదశ జ్యోతిర్లింగాల ఆలయాలు ఉండటం ఈ చార్‌ధామ్‌కి ఉన్న మరో ప్రత్యేకత. 

అలాగే, మెట్లకు ఇరువైపులా... రామేశ్వరం, బద్రీనాథ్‌, పూరీ జగన్నాథ్‌, ద్వారక ఆలయాల తాలూకు నమూనాలనూ దర్శించుకోవచ్చు.

ఆకట్టుకునే నిర్మాణశైలితో భక్తులను ఆనంద పరవశులను చేసే ఈ సిద్ధేశ్వర్‌ధామ్‌లో కోరుకున్నంతసేపు హాయిగా గడిపేయొచ్చు, ఫొటోలూ దిగొచ్చు

ఈ ఆలయానికి చేరుకోవడానికి దేశం నలుమూలల నుంచి రైల్వే సదుపాయాలు ఉన్నాయి. ఇక నామ్‌చీ రోడ్డు ద్వారా కూడా చేరుకోవచ్చు.