పింక్‌ సిటీ - జయపూర్‌ (రాజస్థాన్‌)

రాజస్థాన్‌ మహారాజు 1876లో ప్రిన్స్‌ ఆఫ్‌ వేల్స్‌, క్వీన్‌ విక్టోరియాకు స్వాగతం పలికేందుకు నగరమంతా గులాబీ రంగు వేయించాడట. ఇప్పటికీ అనేక భవనాలు గులాబీ రంగులోనే కనిపిస్తుంటాయి. 

బ్లూ సిటీ - జోధ్‌పూర్‌ (రాజస్థాన్‌)

ఇక్కడి ఇళ్లకు నీలిరంగు వేయడానికి రకరకాల కారణాలు చెబుతుంటారు. ఎండ వేడి, కీటకాల నుంచి నీలిరంగు రక్షిస్తుందని ఇళ్లకు ఈ రంగు వేసుకునేవారట. ఇతరుల కంటే భిన్నంగా ఉండేందుకు ఒక వర్గం వారి ఇళ్లకు నీలిరంగు వేసేవారని వాదనలున్నాయి. 

వైట్‌ సిటీ - ఉదయ్‌పూర్‌ (రాజస్థాన్‌)

ఈ ప్రాంతంలో ఒకప్పటి రాజులు.. భవనాలను తెల్లరాతితో నిర్మించారు. ఇప్పటికీ నగరంలోని ఈ కట్టడాలు ఆకట్టుకుంటాయి. అందుకే ఈ నగరాన్ని వైట్‌ సిటీగా పిలుస్తారు. 

ఆరెంజ్‌ సిటీ - నాగ్‌పూర్‌ (మహారాష్ట్ర)

మహారాష్ట్రలో మూడో అతిపెద్ద నగరమిది. దేశంలోనే అత్యధికంగా కమలాపండ్లను ఇక్కడే పండిస్తారు. దీంతో ఈ నగరాన్ని ఆరెంజ్‌ సిటీగా పిలవడం మొదలుపెట్టారు. 

సిల్వర్‌ సిటీ - కటక్‌ (ఒడిశా)

ఈ నగరం వెండి ఆభరణాలు, కళాకృతుల తయారీకి పెట్టింది పేరు. అంతర్జాతీయంగా గుర్తింపు ఉంది. ఇక్కడ దాదాపు 2 వేలకు పైగా వెండి తరాకాశి(వెండితో కళాకృతులను తయారీ చేసే వారు)లు ఉన్నారు. 

గోల్డెన్‌/యెల్లో సిటీ - జైసల్మేర్‌ (రాజస్థాన్‌)

ఇది పసుపు-బంగారం రంగులో ఉండే ఎడారి ప్రాంతం. ఇక్కడి ఇసుకతో నిర్మించిన కోటలు, భవనాలు పసుపు/బంగారు రంగును ప్రతిబింబిస్తుంటాయి. 

గ్రీన్‌ సిటీ - తిరువనంతపురం, ఛండీగఢ్‌, భోపాల్‌, మైసూర్‌

దేశంలోని ఈ నగరాల్లో ఎక్కడ చూసినా పచ్చదనం నిండి ఉంటుంది. కొన్ని ప్రకృతి ప్రసాదిస్తే.. మరికొన్ని ప్రభుత్వాలు తీసుకున్న చర్యల వల్ల ఆహ్లాదకరమైన వాతావరణం ఏర్పడ్డాయి. అందుకే, వీటికి ఆ పేరు. 

బ్లాక్‌సిటీ - కోల్‌కతా (పశ్చిమ బెంగాల్‌)

దేశంలోనే అతి పురాతన నగరంగా పేరున్న కోల్‌కతాను బ్లాక్‌ సిటీ అని పిలుస్తారు. ఒకప్పుడు ఎంతోమందిని ఇక్కడి బ్లాక్‌ హోల్‌ జైల్‌లో పెట్టి హింసించారట. అలాగే, వీళ్లు పూజించే కాళీ మాత విగ్రహాలు కూడా నలుపురంగులోనే ఉంటాయి.